99 OTLIQ DIVIZIYA JANGOVAR BAYROG’I

99 OTLIQ DIVIZIYA
JANGOVAR BAYROG’I

1941 yil 14 oktabrda Toshkent viloyatida 99-otliq diviziya tuzila boshladi.
99-chi otliq diviziyaning, xususan 381-polkning tuzilishida Abzalov Arif Abzalovich faol ishtirok etdi. 381-chi polk Yangiyo'l tumanida tashkil etilgan. Polk kapitan Maashrobov, keyin mayor Krilov, komissar Irgash Xabibov, komsorg Xasanovlar tomonidan boshqarilgan.
Polkovnik Pavlov 99-otliq diviziya komandiri, mayor Mirzayirov Ubaydulla diviziya komissari etib tayinlangan, keyinchalik uning o'rniga ikkinchi Jahon urushi yillarida ulug' harbiy yo'l bosib o'tgan Uzakov Mullajan Karimovich (keyinchalik general-mayor bo'lgan) batalyon komissari etib tayinlangan.
Eskadron qo'mondonlariga Xudoyberdiev, Tashev, Sodiqov, Gapurov, Xasanov tayinlangan, ular keyinchalik jang maydonlarida qahramonlarcha halok bo'lganlar.
99-chi otliq diviziya Yangiyo'l va Yuqori-Chirchiq tumanlarida mukammal jangovar tayyorgarlikdan o'tib, frontga ketdi. Keyinchalik 99-chi otliq diviziya tarqatib yuborildi va uning qismlari 333-gvardiya o’qchi diviziya tarkibiga kirdi.
O'zbekistonning o'g'il va qizlari jasorat bilan kurashgan Stalingrad uchun bo'lgan janglarda 333-piyodalar diviziyasi alohida ajralib turdi.